የኢትዮጵያ መንገዶች ባለሥልጣን ከ4.7 ቢሊዮን በላይ ብር የሚያወጡ ፕሮጀክቶችን ለኮንትራክተሮች ሰጠ

Published: Thursday, 26 March 2015 Written by Reporter Sunday 22 March 2015 Page: 04

Note : You need an Amharic Reader to read this content

የኢትዮጵያ መንገዶች ባለሥልጣን ከ4.7 ቢሊዮን ብር በላይ የሚያወጡ አራት የመንገድ ፕሮጀክቶችን ለአገር በቀልና ለውጭ ኮንትራክተሮች ሰጠ፡፡
___________________

የዚህ ግዙፍ ፕሮጀክት ተቋዳሽ ከሆኑት አራት ኩባንያዎች ብቸኛው አገር በቀል የሆነው ኩባንያ የንኮማድ ኮንስትራክሽን በሰሜን ሸዋ ዞን ከአጣዬ እስከ መሀል ሜዳ ድረስ ያለውን 60 ኪሎ ሜትር መንገድ በ1.3 ቢሊዮን ብር ተረክቧል፡፡
ቀሪዎቹ ሦስቱ የውጭ ኩባንያዎች ናቸው፡፡ የዩናይትድ ዓረብ ኤምሬትስ ኩባንያ የሆነው አልሀሳብ ጄኔራል ትራንስፖርት ኮንትራክቲንግ ስታብልሽመንት ለመጀመሪያ ጊዜ በኢትዮጵያ መንገድ ግንባታ ውስጥ ተሳታፊ ሆኗል፡፡
አልሀሳብ ጭሮ (አሰበ ተፈሪ) አካባቢ ከአበርክቴ እስከ ገለምሶ ድረስ ያለውን 57.5 ኪሎ ሜትር መንገድ በ1.012 ቢሊዮን ብር ለመገንባት ውል ገብቷል፡፡ ይህ ገንዘብ የተገኘው ከኦፔክ ፈንድ መሆኑን የኢትዮጵያ መንገዶች ባለሥልጣን የሕዝብ ግንኙነት ኃላፊ አቶ ሳምሶን ወንድሙ ለሪፖርተር ገልጸዋል፡፡
ሦስተኛውን የመንገድ ፕሮጀክት የተረከበው ቻይና ሬልዌይ ኮንስትራክሽን ኩባንያ ነው፡፡ ይህ ኩባንያ ከፈለገ ሰላም ዜማ ወንዝ ድረስ ያለውን 83 ኪሎ ሜትር መንገድ በ1.1 ቢሊዮን ብር ለመገንባት ስምምነት አድርጓል፡፡
አራተኛው መንገድ የወላይታ ዞን መቀመጫ ከሆነው ሶዶ ከተማ እስከ ዳውሮ ዞን መቀመጫ ከሆነው ተርጫ ከተማ የሚያመራው 75 ኪሎ ሜትር መንገድ ነው፡፡
መንገዱ በዳውሮና በወላይታ ዞኖች መካከል የሚገኘው ግልገል ጊቤ ሦስት ኃይል ማመንጫ ጣቢያ ፕሮጀክት አቋርጦ የሚያልፍ ነው፡፡ ይህን መንገድ በ1.3 ቢሊዮን ብር ለመገንባት ስምምነት የገባው የቻይናው ኩባንያ ሁናን ሁንዳ ነው፡፡
እነዚህ አራት መንገዶች ከዚህ ቀደም የጠጠር መንገዶች ሲሆኑ፣ የኢትዮጵያ መንገዶች ባለሥልጣን በመደበው ከ4.7 ቢሊዮን ብር በላይ በአስፓልት ደረጃ እንዲገነባ ውል ተገብቷል፡፡
እነዚህ መንገዶች በሦስት ዓመት ጊዜ ውስጥ እንደሚጠናቀቁ የተናገሩት አቶ ሳምሶን፣ ፕሮጀክቶቹ መላ ኢትዮጵያን በመንገድ ለማስተሳሰር የተዘረጋው ዕቅድ አካል መሆናቸውን አስረድተዋል፡፡
አካባቢዎቹ ኢኮኖሚያዊ ጠቀሜታቸው የጎላ ከመሆኑም በተጨማሪ፣ የሕዝብ ለሕዝብ ግንኙነቱን በማጠናከር በኩል ከፍተኛ ድርሻ እንደሚኖራቸው አቶ ሳምሶን አስገንዝበዋል፡፡

This content is published on, Reporter Sunday 22 March 2015 Page: 04

 

Hits: 694