ወደ ግንባታ የሚሸጋገሩ የኃይል ማመንጫ ፕሮጀክቶች በቅርቡ ይፋ ይሆናሉ

Published: Monday, 20 July 2015 Written by Reporter Sunday 20 July 2015 Page: 03

You need an Amharic Reader to read this content

-በሁለተኛው  ዕቅድ  ዘመን  ሰባት  ሺሕ  ሜጋ  ዋት  የኤለክትሪክ  ኃይል  ለማመንጨት  ታቅዷል

በአዲሱ  በጀት  ዓመት  ተግባራዊ  በሚደረገው  ሁለተኛው  የዕድገትና  ትራንስፎርሜሽን  ዕቅድ  ዘመን፣  ወደ  ግንባታ  የሚሸጋገሩትየኤሌክትሪክ  ኃይል  ማመንጫ  ግንባታዎች  በውል  ባይለዩም፣  በዕቅድ  ዘመኑ  ሰባት  ሺሕ  ሜጋ  ዋት  የኤሌክትሪክ  ኃይል  ለማመንጨት  ዕቅድ  እንዳለ  ታውቋል፡፡ 

የውኃ ኢነርጂና መስኖ ሚኒስትሩ አቶ ዓለማየሁ ተገኑ ለሪፖርተር እንደገለጹት፣ በኤሌትሪክ ኃይል ማስተር ፕላን የተቀመጡ ፕሮጀክቶች ቢኖሩም የትኛው ፕሮጀክት ቅድሚያ ይሰጠው የሚለው አልተለየም፡፡

በቅርቡ ለፕሮጀክቶቹ ማነፃፀርያ ከተሠራ በኋላ በዕድገትና ትራንስፎርሜሽን ዕቅድ ውስጥ እንደሚካተት ተገልጿል፡፡ ከእነዚህ ፕሮጀክቶች መካከል ግልገል ጊቤ አራትና አምስት፣ ታምስ፣ ገባ፣ ጨሞጋ ያዳ፣ ገናሌ ዳዋ ከውኃ፣ ከንፋስ አይሻ፣ ከእንፋሎት ደግሞ የኮርቤቲ ፕሮጀክት ተጠቃሾች ናቸው፡፡ 

ከእነዚህ የኤሌክትሪክ ኃይል ምንጮች የትኞቹ ቅድሚያ እንደሚሰጣቸው አሁን በቀረበው የዕድገትና ትራንስፎርሜሽን ዕቅድ ላይ ባይጠቀሱም፣ አዋጭነታቸው ታይቶ የተወሰኑት በቅርቡ እንደሚመረጡ የተገኘው መረጃ ያመለክታል፡፡ 

ከእነዚህ ፕሮጀክቶች መካከል የጣሊያኑ ሳሊኒ ኮንስትራክሽን 1,450 ሜጋ ዋት ሊያመነጭ የሚችለውን ግልገል ጊቤ አራት እንዲሰጠው ፍላጎት አሳይቷል፡፡ ይህ ፕሮጀክት የጊቤ ተፋሰስ ኃይል ማመንጫዎች ቀጣይ ፕሮጀክት ሲሆን፣ በደቡብ ክልል የሚገኙ ነው፡፡ 

በኦሮሚያ ክልል ምዕራብ ሸዋ ዞን ወሊሶ አካባቢ የሚገኘው ሀለሌ ወራቤሳ 420 ሜጋ ዋት ኃይል የማመንጨት አቅም ያለው ነው፡፡ ይህ ፕሮጀክት የቻይናና የሩሲያ ኩባንያዎችን ትኩረት ስቧል፡፡ 

በአማራ ክልል ደብረ ማርቆስ አካባቢ የሚገኘው ጨሞጋ ያዳ 220 ሜጋ ዋት ኃይል ማመንጨት ይችላል፡፡ ይህንን ፕሮጀክት የቻይናው ሲኖ ኃይድሮ ቢረከበውም የዓባይ ገባር ነው በሚል የፋይናንስ ምንጩ በመደናቀፉ ቀጣይ ዕጣ ፈንታው በዕቅድ ዘመኑ ይለያል ተብሏል፡፡ 

በንፋስ በኩል በሶማሌ ክልል አይሻ አካባቢ የታሰበው ፕሮጀክት 300 ሜጋ ዋት የማመንጨት አቅም ሲኖረው፣ የቻይናው ዲንግፋንግ፣ የጀርመኑ ላፍቶ፣ አገር በቀሉ የብረታ ብረትና ኢንጂነሪንግ ኮርፖሬሽን ፍላጎት ከማሳየት አልፈው ዝርዝር ዕቅዳቸውን አቅርበዋል፡፡ 

ነገር ግን እነዚህ ፕሮጀክቶች አዋጭ ቢሆኑም በተለያዩ ችግሮች ወደ ተግባር መሸጋገር ያልቻሉ በመሆናቸው፣ በአዲሱ ዕቅድ ዘመን ችግራቸው ከተፈታ ወደ ግንባታ ሊሸጋገሩ እንደሚችሉ ምንጮች ያላቸውን እምነት ይገልጻሉ፡፡ 

በተጠናቀቀው በጀት ዓመት የታላቁ ህዳሴ ግድብና የግልገል ጊቤ ሦስትን ጨምሮ፣ በአጠቃላይ አሥር ሺሕ ሜጋ ዋት የኤሌክትሪክ ኃይል ማመንጨት የሚያስችሉ ፕሮጀክቶች በመከናወን ላይ ይገኛሉ፡፡ 

ኢትዮጵያ ከአገር ውስጥ በተጨማሪ ለአፍሪካና ለመካከለኛው ምሥራቅ የኤሌክትሪክ ኃይል ለማመንጨት ግዙፍ ዕቅድ ነድፋ ወደ ሥራ መግባቷ ይታወቃል፡፡ 

This content is published on: Reporter Sunday 20 July 2015 Page: 03

Hits: 910